دبدوب الكسلان سمير عبد الباقى و نجلاء رأفت النحل ما تقلش صغير وكبير

شمروخ الأراجوز21
شكشكة شعرية غير دورية بالفصحة العامية
اعقلها.. وأتوكل ..

اعقلها .. وأتوكل .. اعقلها .. وأتوكل ..

* ياسيدي البيه نفسي اعرف ايه اللي انت لما بتقلق بتفكر فيه؟
وايه اللي انت لما بتفرح – تبقي ناسيه
ولما بتحزن... إيه اللي بتفتكره....
وإيه اللي انت ما بتقدرش عليه.
...
الكتاب الكتبه.... أصحاب العواميد المحاسيب..
وولاه الدواوين الكذبة..فقها الكتاتيب..
رجليين الكنبه اليب.. واكر الدواليب..
بيقولوا ان أنت اللي أجريت النيل
وبنيت الهرم الأكبر..
ونشيت ميدان العتبه وغلبت البرازيل..
وان أنت اللي جيبت لنا الديب أكل يوسف
واصطدت الحوت اللي بلع يونس...
والفيل اللي أكله الطير الأبابيل
وانت اللي أمرت الشمس ما تطلعش الأ ف آخر الليل...
علشان صاحي سهران صباحي تخبز عيش الأمه الصابح
تقلي الطعمية للأحياء الشعبية في السمن السايح
توفر للشعب الكادح قدر الفول..
توزن لبتوع الفن الكلمات بأصول
وتدوزن للسميعة الألحان بمكمنجات وطبول...
توزع علي أصحاب الفكر وأهل الذكر عقول
تحلم لها بالحرية وتعلمها تفكر وتقول
وأنك – كان الله في العون علي طول مشغول...
فين ما بتكون الكل بيرمي علي اكتافك ... ليه؟
مش معقول..
. ليه وحدك تبقي المسئول...
عن سوق الجمعة وجداول الانتخابات والطلقة الأولي وحبر المطبعة
وزيوت المصنع.. وحصير الجامع وحمير المطلع، والجمعيات الأهلية المدنية...
وعلف العجل اللي ف بطن أمة بيرضع ..
وأكتوبر والعاشر من رمضان وحصانة السادة النواب والشعرا والأدباء الشبان
وجرايد قبرص ووكالة الإنباء والطيارات اللي علي سهوة تفرقع ومكافحة شلل الإطفال والشيشة التفاحة وزمزاة العمال وساويرس ومزارع دينا ومارينا وسينا وسوق الخواجات ومزادادات الكهنة في إمبابة والنايل سات واللعيبة لأخوات ودروس التلاميذ الخصوصية والعلاوات التشجيعية والأحزاب المخصية ووسائل منع الحمل.
وخطب الجمعة ومؤتمرات الأمن الثقافة وحصر زيادة السكان،
والأمية وخلافات الجماعات السرية الإسلامية واليسارية والشرعية
– كمان!!
مش معقول ... دا حرام...
حرام ياسيدي الباشا ورحمة أمي حرام
وأنت يا دوب في الأول والأخر – آنسان..
النفس اللي بيطلع ممكن ماح يرجعش ياغلبان..
وأنا لا سمح الله لا بالقح ولا شمتان
أنا ما برادحش..
قلبي مكوي عليك قلقان ما بيرتاحش...
الإنسان خلقة الرحمن – للحكمة الإلهية – محدود
في الرؤية.. وفي المجهود..
محدودة طاقته البشرية وليها حدود
من حقة يشيل علي قده..
مفروض يلزم حده..
يعمل غاية جهده قدر الإمكان
دا صحيح.. لكن يملك وقته كمان...
لجل يلاقي فرصة يلاعب ويدلع اولاده واحفاده
ويتوب ... كل ما تتلتل علي قلبه ذنوب...
يقعد يرتاح – حتي ولو يسكت ساكت – يسرح ويا الاحلام .
يتنعوس أو ينعس وينام علي راحته..
يقرا قصة قصيرة، يفرح بقصيدة شعر.
يعيش مع نفسه في رواية مثيرة
يضحك علي نكته سخيفة
يتخض لحادثه مخيفة
يعمل زي الناس
يتمشي افرنجي ف ساعة عصرية
يشم روايح نيل الفقرا
في حبة ترمس أو درة مشوية
يشرب كباية بيرة عشان يتهياله أن الدنيا بخير
ويحس بإنه بني آدم – إنسان وبسيط..
ماشي بكيفة جنب الحيط..
متعشم أن الوضع ح يتغير والدنيا يمكن تضحك له
وربك بالتأكيد ح يعدلها..
يقلبها يجوز أو يعدلها – سيان – مش دي النظرية
- ليه انت لوحدك (دون الخلق) قابل علي نفسك وشايلها بعبلها
سايب نفسك تغرق في تفاصيلها
من حجز تذاكر العمرة لتوزيع كوبونات الفوازير
لمراجعة شهادات الذمة لكل وزير وغفير ومدير
بقي ده اسمه كلام يا أمير،،
علي إيه تقبلها كده ليه؟..
ليل ونها .. زنهار مشغول ..
ع الكلمة اللي اتخبلت تعقلها تعقلها بالخلفة لو انقطعت توصلها .. تحبلها
بالإرض اللي انهطلت أحوالها..
مش عارفة تفرق بين اللي خيلها – وبين اللي خبلها
واللي قتل في روحها خيالها..
فباعت في سوق الحسبه خلخالها
لجل تعشي أطفالها..
مرعوبة من بكرة المجهول..!
..
معقول.. ياسعادة البية معقول؟..
كل ده متعلق في رقبتك ليه:..
ربنا يعطيك العافية .. يابيه؟..
قادر يعفيك ويخفف ويشيل عنك..
طول وقتك مهموم محطوط جوه الكادر
قدرك محتوم.. في هذا الزمن الملغوم..
متحاصر غرقان في أكوام الدوسيهات والورق المختوم
من منشية ناصر للوراق.. من توشكا لبولاق للفيوم..
بمزاجك والا مخموم؟..
في كل التفاصيل ملخوم...
تراجع اشارات القطر الميرى خوفا من جهل السواق..
واستمارات العهده وفواتير الاسواق حرصا علي قرض البنك اللي لهفة السراق
من شرق التفريعة لغرب القشلاق..
وحدك مهموم بتظبط كل الأوراق حتي جوابات العشاق!
ولا حد بيرحم.
مع ذلك محسود متهوم..
ارحم نفسك ياعم ارتاح – انزل في البحر وبلبط
خد نفسك حر يامسكين – اتكرع – زرط...
اتمطع زي بقية البني آدمين
افرد رجليك واضربها طبنجة – استعبط..
امبارح راح.. اتسرسب من كف ايديك
زي ما فلسع من ايد اللي قبليك
ياراجل.. زيح من علي كتفك .. قوم واتشجع
زيحهم من حواليك .. افلت من أرابيزهم
كله بيرمي الحجة والتقل عليك..
كفاياك من خيبة عواجيزهم
ماتشيلش همومنا وفكر في مصيرك..
لحد كده كتر خيرك!!!
...
هدي الأرض المغدورة
لساها بتحبل
من لمسة إيد الفلاح بالتوم والتين والتفاح..
وتبان كده عيانة وجعانة وسهتانة
لكن لما يفيض الكيل..
بتقوم حتي لو مالفيتش سلاح
غير دعوة أرملة مظلومة.. أو طوبة طفل يتيم –
ح تقوم علي سهوه وهيه القومه
ولا عسكر تنفع وياها ولا حكومه.. ولا شوم
فاغسل من بلاويها ضميرك..
العدة من مده واكلاها بارومة..
فارحم نفسك .. وارتاح..
لأنه مؤكد – بيك أو من غيرك..
راح يطلع ليها بكرة صباح....
كلام حواديت
بما أني شاعر...
وفلاح..
كان قلبي كمان أرضي
براح..
بما إني فلاح..
وزراعي ..
كان سهل خداعي ..
ومتاح
لذا كل نجوم اللوتاريه
فنيه وسياسية . وسلاح...
بالجملة – أو بالقطاعي ...
بتبيعني ف سوق (الوطنية)
وتعاير قلبي بأوجاعي.....
وتزيدني جراح...
خطوط عوالم
من حظ أمه / خليفة الفراعين
أن البلاد دي محصنة / بالدين
من عهد مينا / لحقبه الملامين
دايما يلاقي الخدامين / جاهزين
يعلوا حس الطبل / ع السامعين
ويقيسوا مللي خطوته / مترين
طبيخه / يتسبك بلا مواعين
وفسيخ / يطلع منه شربات عجب
إذ يفتحوا له باب تاريخ / وهمي
يبقي جهول / إنما قوله سلاسل دهب
وفسل / لكن بأمر آمون بطل قومي
وأمي / لكن بيفتي في فنون الإدب
ما دام بكرمه التزم / بالراتب اليومي
لحين يحين الأجل / علي المهل أو بالعجل
فيتشتم بالزجل والشعر / من غير زعل
وبأمر من حل وبعده / يبقي رمز الهبل...
ويتشطب أسمه فور الدفن / دنيا ودين.!

شكشكة ع الماشي
أنا كل ما اقر أحس أني أجهل
ضاعت مني حاجة...
وما لحقتهاش
وكل أما اقابل بشر ..
غير معارفي
ياشوف نفسي أعمل ياأجمل
يلاقيني أهبل
وضارب طناش
أو القي المبرر
لتفسير مخاوفي..
في أسباب فاتتني
ولا فهمتهاش
أتاري الحقيقية بحورها غميقة ..
وما دركتهاش
واكتر قوي م اللي عارفة /
- وشايفة كتير أو طشاش .....
فيا من بتفتي كأنك نبي
ولما بتخطب بتشخط وتنطر
وتفشر وتحكي بخيال لولبي
تمهل ... تفكر .. تاني وتذكر
يجوز ياغبي..
أنا عندي حدوته
أنت ، ما سمعتهاش
رباعيات- لكن وربع
(1)
سي عليوة أفندي العقدة المشهور بالعرسان
آخر حفاظ تقاليد الكتبه في ديوان السلطان
الصبح أن روق بالقهوة المرة من دم الشيوعيين
يمزف سهرياته الفكرية باكبة النية من لحم الأخوان ..
..
وينام سكران طينة بعرق الامن البعثى الحمضان
.
(2)
كتاب الصوبات الأمنية العربية الفاشية الديمقراطية
قاعدين بينوحوا علي دمن الأحلام المهزومة العربية
واكترهم ببجاحة بيبكي ويندم ع اليغمة السوفيتي
حتي الكحيتي اللي شارك بصراحة في دبح الحرية!..
..
ايام ما كان سكيتي بيمخمخ تقاريره السرية
.
(3)
ياما نفسي لو انزل تاني غيط القمح المحصود
وألم بواقي السبل اللي ف حكم المفقود
أجمعة وأحمصة.. وأدري منه الحب
وازرعه تاني يزهره في الإرض الأمل الموعود
..
ياتجار اليأس أخجلوا.. ما زال للحلم وجود!



(4)

عجيبة طبع الشجر با بدع تماخيخه
تتاملة بحب يكشف لك تواريخه
كما بشوق الحياة يرحل لضوء الشمس
يطلق إذا حس زحف الموت شماريخه
..
عشق الوجود نبض نخلة زي بطيخة
المضيفة
مصطبة مصرية بحب مصر مكفية
المخـــــد للخيبــــة
للشاعر عبده المصري
معهلش ياابو سمرة !
دمع الرجال م القهر مش عيبة
ماهوش زمن شعرا ولا أبطال..
إمسح شعار النبل م الجدران
وابكي براحتك ملك صناع في الرمال
لا الأندلس .. أندلس .. ولا عاد فيها فرسان !
الدم من غير تمن والشعر بالوقة وبالقنطار
حتي أغاني الوطن رقاصة في الأعلان
والمجد كل المجد للخيبة
فتافيت جنان باشت ياعم سمير
تحت السما بتزقزق الطراطير
وتنهنه العصافير لريح أمشير
إلبس هدومك وانزل الشارع...
تلقي الرفاقة كلهم قالعين..
وماهوش زمن شعرا يادون كيشوت
واقف لوحدك ماسك النبوت ..
بضحكة بنت حرام وبنت بنوت
والحزن طالع في الضوافر ني
خلينا ننسي اللي اندفن في الضي
نشربه علي روح الوطن .. ونميز
حرية للبز اللي بطل.. هز
حرية الحلبة وتفل الشاي..
الرجرجة رمز الزمان الجاي
والمجد
المجد كل المجد للخيبة
عبده المصري الاسماعلية اكتوبر2003




شمروخ والأراجوز
نشرة غير دورية علي قد الحال .. لا جريدة جرنا ولا حتي مجلة ولكنها مستقلة


هموم راجل مصري
عمك (عطية) البسيط
الورشة حارقاه قبل الغيط
لكن دماغه بحر محيط
يحلم ( لهم) بالحرية
و (عطيه) لا باشا ولا بيه
لكن الحمول مرميه عليه
لا كل ولا مل ابن الايه
ولا اتلوي وخلف النية
عشان كده رحت له ماشي
وباقولها كلمه ما تنياشي
(مصر) الحبيبة ما عايشاشي
إلا بنفس زي (عطية)
صوت شعبها نبض عروقه
وحضنها ساحته وطوقه
ياريتها تطفي نار شوقة
وتقوم معاه ع الحرامية!

دستور ياسيادي
ما فيش سخص سوبر ..
زعيم أو ملك ولا شعب يمشي بزرار ..
زمبلك
خلاص انتهي عصر نصف الإله
مافيش عدل يبني أساسه الطغاه..
ولا إنسانية ف حياة تووماتيك
مافيش غير كرامتي
وكرامتك / وطن
بهم نستحق الوجود والحياة
في حرية ...
تكفينا شر المحق...
ودستور...
يعامل البشر بالتساوي
ويجمعنا من عاديات الزمن
بدون غوغائية
ولا دوجماتيك..!
نصيحة بايخة لناقد متجول
في كل مظاهرة اغسل توبك من رجس الاشتراكية
الفرصة بقت ذهبية ومتاحة الآن للتسوية
حتي الرب انحاز بإرادته للأجهزه والفيروس
فاخلص م العار الثوري ح تترستا في الأزمة الجاية ..
...
ما عادش مكان للأحلام – العصمة في إيد الحرامية!
.
الثابت المتحول
ياريتني موجه
في حضنك يانيل
طليقة حرة
بترمح شوق لحضن البحر
ولا كونش نخلة
أسيرة في شطوطك
ولا – عروسة
رابطها لخيوطك قديم القهر
والشمس للمواويل...
بحلم برحلة سفر
أعود بضي الفجر!
حكمة شبه شعبية
يوم تقبي حر بصحيح تبقي حر القرار
حر الإرادة تقاسي أو... تبلغ فرار
حتي لو الدنيا نتفت ياطاووس ريشك
ترفض عشان أكل عيشك تفقد الاختيار
...
الطير يموت فى القفص و السبع فى القيد حمار
.
لازم وبكرة اكيد ح يتم شئ ما
أعتي الجبال ينكسر لازم بشرخ ما
الكدب قادر ولكن قدره محدوده
الليله سوده وح يبددها ضي ما...
...
قوم صلي للشمس.. شعرك هز قلب .. ما..
.





السنة الثانية
عن أي حزب وأي ملة وح تعيش بنفسكم مش بس بفلوسكم .. والغاوي ينقط
بطاقيته .. وألف هلا بالزجالين وبالشعراء

1

2

3

4

5

6

7

8

9

10